សូមគោរព ៖
- ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជាទីគោរពដ៏ខ្ពង់ខ្ពស់
- លោកជំទាវ Anne Lemaistre, តំណាងអង្គការយូណេស្កូប្រចាំកម្ពុជា
- ឯកឧត្តម វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ:
- ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ អន្តរជាតិ ជាទីមេត្រី
ថ្ងៃនេះ ខ្ញុំមានសេចកី្តសោមន្សរីករាយដែលបានចូលរួមក្នុងពិធីផ្សព្វផ្សាយរបាយការណ៍ពិនិត្យ តាមដានសកលសី្តពីការអប់រំសម្រាប់ទាំងអស់គ្នាឆ្នាំ២០១២នាពេលនេះ។ ក្នុងនាមក្រសួងអប់រំ យុវជន និងកីឡា និងក្នុងនាមខ្លួនខ្ញុំផ្ទាល់ ខ្ញុំសូមថ្លែងអំណរគុណជាអនេកប្បការ និងសូមស្វាគមន៍យ៉ាងកក់ក្តៅចំពោះ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដែលបានអញ្ជើញចូលរួមជាអធិបតីដ៏ខ្ពង់ខ្ពស់ ព្រមទាំងប្រតិភូទាំងអស់ចូលរួមចែករំលែកនូវបទពិសោធន៍ និងចំណេះដឹងស្តីអំពីការអភិវឌ្ឍជំនាញនៅក្នុងវិស័យអប់រំ។
ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលនៃព្រះរាជាណាចក្រកម្ពុជាបានធ្វើការវិនិ- យោគលើកំណែទម្រង់វិស័យអប់រំ ដើម្បីទទួលបាននូវប្រព័ន្ធអប់រំមួយប្រកបដោយគុណភាពស្របតាមស្តង់ដារជាតិ តំបន់និងពិភពលោកក្នុងការអភិវឌ្ឍធនធានមនុស្សដើម្បីរួមចំណែកកសាងជាតិមាតុ-ភូមិ។ ជាក់ស្តែង តាមរយ:នៃអង្គសន្និបាតបូកសរុបលទ្ធផលការងារអប់រំ យុវជន និងកីឡានាពេល ថ្មីៗនេះ បានបង្ហាញពីលទ្ធផលដែលសម្រេចបានថែមទៀតក្នុងឆ្នាំសិក្សា២០១១-២០១២កន្លងមក ទាំង បរិមាណ និងគុណភាព នៃវិស័យអប់រំ យុវជន និងកីឡា។ បច្ចុប្បន្ន យើងទទួលបានអត្រាពិតនៃការសិក្សារបស់កុមារនៅបឋមសិក្សា៩៧ភាគរយ ដែលជាលទ្ធផលអាចឱ្យកម្ពុជាសម្រេចបានសកល កម្មអប់រំបឋមសិក្សានៃការអប់រំសម្រាប់ទាំងអស់គ្នានាឆ្នាំ២០១៥។ ចំពោះការលើកកម្ពស់គុណភាព និងប្រសិទ្ធភាពអប់រំ ក្រសួងអប់រំ យុវជន និងកីឡាបានយកចិត្តទុកដាក់អភិវឌ្ឍសម្ថភាពមន្រ្តី កែលម្អកម្មវិធីសិក្សា និងបំពាក់សម្ភាររូបវន្ត ដើម្បីបម្រើឱ្យការរៀន ការបង្រៀន និងការស្រាវជ្រាវនៅតាមគ្រឹះស្ថានសិក្សា។
ជាមួយគ្នានេះដែរ ក្រសួងបានយកចិត្តទុកដាក់ដល់ការងារតម្រង់ទិសវិជ្ជាជីវ:នៅតាមវិទ្យាល័យ ចំណេះទូទៅនិងបច្ចេកទេស ហើយជាលទ្ធផលយើងបានរៀបចំកម្មវិធីសិក្សាបំណិនជីវិតសម្រាប់បឋម និងមធ្យមសិក្សា គោលនយោបាយ កម្មវិធី និងសៀវភៅតម្រង់ទិសវិជ្ជាជីវ:សម្រាប់មធ្យមសិក្សា បឋមភូមិ ដែលជាកម្មវិធីសិក្សាធ្វើឱ្យសិស្សទទួលបាននូវជំនាញមូលដ្ឋានស្របតាមចតុស្តម្ភទាំងបួន នៃគោលការណ៍អប់រំ គឺ រៀនដើម្បីមានចំណេះដឹង រៀនដើម្បីមានចំណេះធ្វើ រៀនដើម្បីក្លាយជាពលរដ្ឋល្អ និងរៀនដើម្បីចេះរស់នៅជាមួយគ្នា។
យោងទៅលើប្រធានបទ យុវជន និងជំនាញ ជាការចាំបាច់ដែលយើងត្រូវមានការវិនិយោគ បង្កើតបរិយាកាសសហគ្រិនភាព បង្កើតការងារ ការប្រកបរបរចិញ្ចឹមជីវិតដោយនិរន្តភាព ការអភិវឌ្ឍ ជំនាញព័ត៌មានវិទ្យា (ICT) និងជាពិសេសផ្តល់ឱកាសដល់យុវជនឱ្យទទួលបានសមត្ថភាពជំនាញផ្សេងៗ ដើម្បីឱ្យពួកគេរកការងារធ្វើបានដោយងាយស្រួល។ នៅក្នុងតំណាក់កាលសង្គមពុទ្ធិ យើង មានសុទិដ្ឋិនិយមថា ការទទួលបានការគាំទ្រពីដៃគូអភិវឌ្ឍ អ្នកពាក់ព័ន្ធទាំងអស់ និងសហគមន៍ជាតិ ពិតជាបានរួមចំណែកក្នុងការអភិវឌ្ឍជំនាញដល់យុវជនសំដៅកាត់បន្ថយភាពក្រីក្រនៅក្នុងប្រទេស។
បច្ចុប្បន្នប្រសិនបើយើងពិនិត្យជុំវិញខ្លួនយើង ការផ្លាស់ប្តូរ ការវិវត្ត ការអភិវឌ្ឍបានកើតឡើង គ្រប់ផ្នែក និងគ្រប់វិស័យ ដូចជាផ្នែកបច្ចេកវិទ្យា សេដ្ឋកិច្ច សង្គម និងជាពិសេសផ្នែកអភិវឌ្ឍជំនាញតែម្តង។ ដើម្បីឆ្លើយតបនឹងបរិបទខាងលើនេះ ក្រសួងអប់រំ យុវជន និងកីឡា បានចាប់ផ្តើមបង្កើតកម្មវិធីអប់រំ បណ្តុះបណ្តាលផ្សេងៗ ដើម្បីជួយកុមារ និងយុវជនទទួលបាននូវជំនាញសំខាន់ៗដូចជា ជំនាញមូលដ្ឋាន ជំនាញបច្ចេកទេស ។ល។ ពីកម្រិតបឋមសិក្សារហូតដល់ឧត្តមសិក្សា ដែលក្នុងនោះគោលដៅយុទ្ធសាស្ត្រកម្មវិធីតម្រង់ទិស វិជ្ជាជីវៈ និងអប់រំបច្ចេកទេស ត្រូវបានរៀបចំដូចខាងក្រោម៖
- ឯកឧត្តម លោកជំទាវ
- លោក លោកស្រី ភ្ញៀវកិត្តិយសជាតិ អន្តរជាតិ
ខ្ញុំជឿជាក់ថា ការពិភាក្សាផ្នែកបច្ចេកទេស ការចែករំលែកបទពិសោធន៍ និងចំណេះដឹង ទាក់ទងនឹងបញ្ហា ការប្រឈម អភិក្រម មាត្រដ្ឋាន ពិតជារួមចំណែកឆ្លើយតបជាក់ស្តែង និងមានប្រសិទ្ធភាពក្នុងការអភិវឌ្ឍជំនាញដល់យុវជន។ ក្នុងបរិបទនេះ យើងបានដាក់ចេញនូវមគ្គុទ្ទេសឆ្ពោះ ទៅកាន់កម្មវិធីសិក្សាដែលសមស្រប ដោយសង្កត់ធ្ងន់ទៅលើគោលការណ៍ធំៗជាមូលដ្ឋានចំនួន២ គឺ “ ការអភិវឌ្ឍកុមារ និងយុវជន ” និង “ការសិក្សា របស់កុមារ និងយុវជន ”។
ដូច្នេះ ការកសាងគោលនយោបាយ និងផែនការអភិវឌ្ឍន៍វិស័យអប់រំនៅតែជាគោលដៅចម្បង និងជាមូលដ្ឋានសម្រាប់ការអប់រំនាពេលអនាគត ពិសេសក្រោយពីការសម្រេចបានការអប់រំសម្រាប់ទាំងអស់គ្នាឆ្នាំ២០១៥ខាងមុខ ។ បច្ចុប្បន្ន ក្រសួងអប់រំ យុវជន និងកីឡា បាននិងកំពុងរៀបចំផែនការយុទ្ធសាស្ត្រវិស័យអប់រំ៥ឆ្នាំលើកទី៤ គឺ២០១៤-២០១៨ ផែនការគោលសម្រាប់សាងសង់ហេដ្ឋា រចនាសម្ព័ន្ធអប់រំគោលនយោបាយស្តីពីការអប់រំបច្ចេកទេសសម្រាប់មធ្យមសិក្សា គោលនយោបាយ អភិវឌ្ឍកម្មវិធីសិក្សាចំណេះទូទៅ គោលនយោបាយស្តីពីក្របខ័ណ្ឌធានាគុណភាពអប់រំ និងចក្ខុវិស័យ ឧត្តមសិក្សាឆ្នាំ២០៣០ ដែលគោលនយោបាយ និងផែនការអភិវឌ្ឍន៍ទាំងអស់នេះ មានលក្ខណះ ឆ្លើយតបទៅនឹងយុទ្ធសាស្រ្តតរបស់រាជរដ្ឋាភិបាលនិងផែនការយុទ្ធសាស្ត្ររអភិវឌ្ឍន៍ជាតិ២០១៤-២០១៨ សំដៅឈានទៅសម្រេចបានគោលដៅអភិវឌ្ឍសហសវត្ស។
ជាទីបញ្ចប់ ខ្ញុំសូមវាយតម្លៃខ្ពស់ចំពោះ ពិធីប្រកាសឲ្យប្រើរបាយការណ៍ពិនិត្យតាមដានសកល សី្តពីការអប់រំសម្រាប់ទាំងអស់គ្នាឆ្នាំ២០១២ នាពេលនេះដែលជាវេទិកាមួយមានការចូលរួមពីគ្រប់មជ្ឈដ្ឋាន អ្នកពាក់ព័ន្ធវិស័យអប់រំ ពិសេសដៃគូអភិវឌ្ឍឲ្យបន្តនូវស្មារតីគាំទ្រ និងឧបត្ថម្ភដល់ការលើកកម្ពស់ វិស័យអប់រំកម្ពុជា ហើយតាមរយ:របាយការណ៍ពិនិត្យតាមដានសកលនេះដែរក៏បានឆ្លុះបញ្ចាំងអំពី “ការគិតគូរឡើងវិញបញ្ហាអប់រំ និងជំនាញ” ដែលជាដំណើរការអំពាវនាវរកចំណេះដឹងរួមមួយក្នុងការ អប់រំកុមារ និងយុវជនឲ្យទទួលបានការអប់រំប្រកបដោយសមធម៌លើគុណតម្លៃវិជ្ជាជីវ:ជំនាញ ការជំរុញឲ្យមានសុចរឹតភាព ការគោរព ការប្តេជ្ញាចិត្ត និងមេត្តាធម៌។
ខ្ញុំសូមជូនពរ ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ អន្តរជាតិ ទំាងអស់ទទួលបាននូវពុទ្ធពរទាំងបួនប្រការ គឺ អាយុ វណ្ណ: សុខ: ពល: ព្រមទាំងជោគជ័យគ្រប់ភារកិច្ច។
|
Sunday, April 28, 2013
ពិធីផ្សព្វផ្សាយរបាយការណ៍ពិនិត្យតាមដានសកល សី្តពី ការអប់រំសម្រាប់ទាំងអស់គ្នា ឆ្នាំ២០១២
Subscribe to:
Post Comments (Atom)
No comments:
Post a Comment